Ég sit enn föst við skriftir og er að reyna að tapa ekki geðheilsunni. Ég verð laus úr prísundinni eftir u.þ.b. 3 vikur og þá get ég hætt að vorkenna sjálfri mér.

Fór á Foo fighters á þriðjudaginn með Eddu, Val, Önnu Sig, Önnu K og Valdísi. Það var alveg meiriháttar gaman, þeir eru ekkert smá skemmtilegir og ekki skemmir fyrir hversu sætur Dave Grohl söngvari er. Við vorum náttúrulega eins og sannir rokkarar og tróðum okkur eins framarlega og við komumst og hoppuðum þar í kremju og 200 stiga hita í 4 lög en svo var úthaldið búið. Þvílík átök, troðningsúthaldið hefur nú eitthvað minnkað með árunum held ég.

Nafnavenjur á Akranesi: Hlini, Hjálmur, Alfa.

Pirringur vikunnar: útlendingar á þjóðveginum sem keyra á 70, rosalega er ég orðin þreytt á þessu liði sem að er bara að dóla sér eins og það sé á einhverjum sveitavegi, urrrrr. Þeim fer nú óðum fækkandi þegar fer að líða á haustið, sem betur fer.
Svala er alls ekkert pirraður ökumaður né pirruð manneskja yfir höfuð.

Alltaf kemur bloggandinn yfir mig þegar ég er að skrifa þessa blessuðu ritgerð. Maður vill helst vera að gera eitthvað allt annað. Greyið ég, greyið ég, greyið ég :/ :/ :/ Neih ég segi bara svona.

Ég vil bara benda ykkur á að Johnny Depp er ofurfoli og ég mæli með Sjóræningjum Karíbahafsins. Rosalega skemmtileg mynd og ekki má heldur gleyma Orlando Bloom sem er ansi sætur líka (hann leikur Legolas í Lord of the Rings), hann mætti samt heita aðeins karlmannlegra nafni. Veit ekki alveg hvað málið er með þessari nafnagift.

Pirringur vikunnar: KASTLJÓS. Ég þoli ekki kastljós lengur, þarf alltaf að ræða um allt sem gerist. Eins og t.d. með þessar blessuðu hrefnuveiðar, hverjum er ekki sama þótt nokkrum útlendingum finnist þetta hræðilegt o.s.frv. þarf að eyða heilum kastljósþætti í að tala um það. OHHH stundum verð ég bara svo pirruð á því þegar verið er að tönglast á sama hlutnum aftur og aftur. Kárahnjúkavirkjun er annað dæmi, það átti alveg að drepa mann með því, ekki talað um annað í fréttum og KASTLJÓSI kvöld eftir kvöld.

Ég vil líka fara að sjá almennilega sjónvarpsdagskrá ekki þessar endursýningar endalaust.

Akurnesingar heita skrýtnum nöfnum, er eitt af því sem ég er búin að komast að. Dæmi: Sumarlína, Skarpheiður, Páley, Minney, Heiðbjört, Eufemia. Ég biðst velvirðingar ef ég hef móðgað einhvern en frá mínum bæjardyrum séð eru þetta skrýtin nöfn.

Ég er í þessum skrifuðu orðum að gefa upp öndina yfir ritgerðarskrifum, er sem sagt byrjuð á lokaritgerðinni af fullum krafti. Get ímyndað mér skemmtilegri hluti til að eyða laugardagskvöldi í eins og t.d. að vera í núna í bænum á menningarnótt :(
Síðasta helgi var viðbjóður svo að það er ágætt að maður haldi sig fjarri djammlífinu í einhvern tíma og reyni að virkja heilasellurnar í staðinn fyrir að lama þær. Jæja nóg af neikvæðni í bili, það er nóg að hlakka til því núna fer að líða að Foo fighters tónleikunum, jibbí ég hlakka ekkert smá til. Svo er ég að fara á Grease 30. ágúst með Önnu og Valdísi og þá held ég að maður neyðist til að kíkja út á lífið eftir á.

Á fimmtudaginn fór ég í saumaklúbb og hitti bekkjarsystur mínar úr MR og var kominn tími til, hafði ekki hitt þær flestar í rúmlega ár. Agnes, Erla og Hólmfríður eru allar óléttar og Erla og Hólmfríður eru á leiðinni með barn númer 2. Þessar óléttur koma alltaf í kyppum. Það var rosa gaman að hitta þær og óneitanlega var mikið talað um meðgöngur og barneignir en það var allt í lagi. Mér leið samt eins og ég væri unglingadrullan í hópnum, sérstaklega þegar þær fóru að tala um að þær skildu ekki hvernig fólk nennti að standa í þessu djammi. Svo barst talið að útbrunna djammliðinu og þá fékk ég svoldið í magan og fór að spá hvort að það væri nokkuð litið á mig sem eina af þeim hópi af því mér finnst ennþá gaman að kíkja á djammið? Það verður þá bara að hafa það. Ég skil samt vel að þær nenni ekki að djamma þegar þær eru búnar að stofna fjölskyldu og koma sér vel fyrir, ekki myndi ég nenna því.

TILKYNNING: Ef ég verð ennþá að djamma fimmtug á Kaffi Reykjavík þá megið þið hnippa í mig.

Jæja best að halda áfram að skrifa um not hnoðra til lækninga :):):)

Þá er verlunarmannahelgin liðin og nú fer bara að líða að hausti. Ég fór í ferðalag með mömmu,pabba og systkinum mínum (þeim Eddu og Val). Við skelltum okkur á Vestfirði og þræddum þá á laugardaginn og sunnudaginn og gistum á hótel Eddu á Núpi í Dýrafirði. Ég hafði aldrei komið á Vestfirðina áður og ég féll alveg fyrir þessum landshluta. Ótrúlega fallegt þarna og miklu meiri gróður en ég bjóst við, á mörgum stöðum er kjarr alveg milli fjalls og fjöru. Ekki skemmdi veðrið fyrir, sól og blíða allan tíman. Það var líka viss stemning að ferðast um með familíunni, það hefur ekki gerst síðan ég var 14 ára. Á sunnudagskvöldið komum við aftur í Borgarfjörðinn og gistum í bústaðnum. Þetta var sem sagt ekki djammhelgi hjá mér, bara rólegheit. Ég get nú samt sagt ykkur það að ég varð svoldið kærastasjúk eftir þetta ferðalag, ég væri alveg til í að eiga kærasta sem ég gæti ferðast um landið með "snökt". Maður jafnar sig nú samt fljótt á svona hugsunum ;)

Er komin með myndalink. Ég er nefnilega tölvuséní og er búin að setja fullt af myndum inn. Nei ég má ekki monta mig of mikið, þetta er nú allt henni Önnu Sig að þakka en hún hjálpaði mér við þetta. TAKK ANNA.
Endilega kíkið við :)