Ég vil bjóða nýjan bloggara velkominn í hópinn en það er hún Valdís
vinkona mín og hvet ég alla til að kíkja á það.
Annars er ég orðin svoldið spennt fyrir leiknum í kvöld en þá mætast Holland og Portúgal í undanúrslitum. Ég vona svo sannarlega að Portúgal vinni, þessir Hollendingar fara eitthvað í taugarnar á mér, Áfram Portúgal.

Ég er orðin algjör fótboltabulla, horfi á alla leikina og æsi mig og öskra. Edda systir var hérna í sveitinni í gær og ég held hún hafi bara verið smeyk við mig. Þetta var nú leiðindaleikur milli Svía og Hollendinga en AUÐVITAÐ þurftu Hollendingar að vinna þar sem ég hélt með Svíum. Þoli ekki vítaspyrnukeppnir, þær eru bara til að drepa mann úr spenningi. Nú hangi ég heima í veikindafríi og hef ekkert að gera þannig að fótboltinn er bara hin fínasta skemmtun. Ekki skemmir það fyrir að þetta eru helv... flottir gaurar þarna inn á milli ég verð bara að viðurkenna það. Aðalfolarnir eru þó farnir úr keppninni, Beckham og Zidane, því miður. Í kvöld eru svo Danir og Tékkar að spila. Ég held nú með Dönunum en Tékkarnir eiga nú skilið að vinna eru búnir að vera með besta lið keppninnar hingað til svo að ég býst við að það endi með sigri þeirra. Það sem er fyndnast við að horfa á þessa Evrópukeppni að hlusta á íþróttafréttamennina lýsa leiknum sérstaklega þegar þeir verða mjög æstir. Stundum segja þeir bara sama hlutinn með vissu millibili og ég held að Adolf Ingi Erlingsson hafi sagt svona tuttugu sinnum í gær "ef að það er ennþá markalaust eftir framlengingu þá er það vítaspyrnukeppni". Ok Adolf we get it.

Forsetakosningarnar voru víst í gær en ég nennti ekkert að fylgjast með þeim. Nákvæmlega ekkert spennandi við þær nema kannski að sjá hversu margir skiluðu auðu. Eitt má þó segja að ég er rosalega fegin að þeim sé aflokið það þýðir að maður þarf ekki að hlusta á geðveikisrausið í honum Ástþóri Magnússyni. Sá er tæpur og er eitthvað að misskilja lífið og ef hann er spurður að einhverju sem hann getur ekki svarað þá segir hann bara "heimsfriður, heimsfriður". Hvernig ætlar hann að koma á heimsfriði? hefur hann eitthvað sagt um það? Þoli ekki svona skrípaleik.

Halló allir saman, þetta er orðið að mánaðarlegum skrifum hjá mér. Það er nú betra en ekkert. Er ennþá að ná mér eftir síðustu viku, fór á djammið 3 daga vikunnar. Jesús minn er ekki gerð fyrir slíkt lengur. Á miðvikudaginn fór ég í óvissuferð með vinnunni, sem sagt öll Lyf og heilsu apótekin saman. Það var svaka fjör, fórum út á Faxaflóa og vorum í partýi þar, partýið var svo búið um miðnætti og þá fór ég og hitti Eddu systur á Hverfisbarnum. Við djömmðum til 4 og ég var geðveikt túristaleg í flíspeysu og með bakpoka og fílaði mig bara vel. Því miðu kom samt brunagat á flíspeysuna svo að ég mæli ekki með slíkum klæðnaði á skemmtistöðum Reykjavíkurborgar.
Á föstudagskvöldið fór ég í bústað til Þóreyjar og Eysteins austur í Miðhúsaskógi í tilefni af brúðkaupi þeirra þann 17.júni. Elsa og Fjalar og Jósep og Kristjana voru líka þar og var bara svaka stuð, kareokí og læti. Ég þurfti svo að vakna snemma á laugardeginum og hafa mig til og bruna í bæinn í útskriftina frá Háskólanum sem byrjaði eitt. Mamma var að útskrifast með mastersgráðu í íslensku og brilleraði bara. Eftir athöfn var haldið heim til ömmu og afa og skálað í kampavín og svo fórum við fjölskyldan út að bora á Rossopommodoro. Það var ágætur matur þar á góðu verði, ekkert súper samt. Um kvöldið lá leiðin næst í útskriftarveislu til Ólafar vinkonu en hún var að útskrifast út læknisfræði með glæsibrag. Það var mjög skemmtileg veisla og fórum við eftir hana til Önnu Katrínar. Svo var náttúrulega haldið í bæinn á kaffibarinn og þar voru Gullfoss og Geysir að spila en þeir spila skemmtilegustu tónlist í heimi. Ógeðslega gaman þar en ég var samt orðin ansi full undir lokin, enda dauðþreytt eftir átök síðustu daga. Skemmtileg helgi en þetta verður ekki endurtekið í bráð.