Jæja, þá er seinasti dagurinn hér á Akranesi runninn upp. En hvað tíminn líður hratt. Ég gerði mér lítið fyrir og bakaði eitt stykki súkkulaðiköku í gær til að koma með í vinnuna. Ekki eitthvað sem ég er vön að gera og hún kom bara rosalega vel út. Það verður svolítið skrýtið að vera ekki að vinna hérna lengur en náttúrulega spennandi að fara að byrja á nýjum stað.

Ég fer á Húsavík á mánudaginn og verð í 2 VIKUR en ég hélt að ég þyrfti bara að vera í viku. Þetta verður spennandi, fæ stúdíóíbúð til að vera í sem er rétt hjá apótekinu og svo hef ég ekki komið á Húsavík síðan ég var krakki. Verst bara að ég get ekki smyglað honum Jenna með ;)

Róleg helgi framundan hjá mér eftir átökin síðustu helgi. Góða helgi allir og næsta blogg mun vera úr Þingeyjarsýslunum.

Þá er frábærri helgi lokið og maður er mættur myglaður til vinnu ennþá hálf þunnur. Airwaves hátíðin var frá miðvikudagskvöldi til laugardags og fór ég á tónleika öll kvöldin. Ógeðslega gaman og ég held bara að þetta verði árlegt hjá manni, algjört must. Endaði svo með svaka djammi á laugardagskvöldið og það kvöld stendur upp úr hjá mér en hápunkturinn var á Gauknum þegar the Shins hófu að spila, uppáhaldshljómsveitin mín í dag. Þeir voru snilld. Svo var haldið á Sirkus og djammað fram á morgunn.

Vá hvað ég nenni ekki að vera í vinnunni núna !

Fór að skoða lítið kríli á miðvikudaginn en Villi bróðir hans Jenna eignaðist lítinn strák á þriðjudaginn. Algjör dúlla, fékk að halda á honum. Verð alltaf hálf stressuð að halda á svona litlum börnum, manni finnst þau svo brothætt eitthvað.

Þá er veturinn farinn að minna á sig og ég búin að lenda í fyrstu hrakningum vetrarins. Frekar svona míníhrakningar þannig var að þegar ég kom úr göngunum í morgun þá sást ekkert, algjör blindbylur. Þurfti að stoppa á nokkrum stöðum þar sem að ég sá nákvæmlega ekkert nema hvítt og bíða eftir betra skyggni. Sem betur fer var nú engin hálka þar sem ég er nú bara á sléttum sumardekkjum. Ætla bíða aðeins með að skipta yfir á naglana því að ég man í fyrra þá setti ég þá á í flýti þegar fyrsti snjórinn k0m og svo rigndi stuttu seinna og maður var skröltandi á nöglunum á tómum vegunum í langan tíma.

Fór á Blindsker, myndina um Bubba, á laugardagskvöldið og fannst hún mjög skemmtileg. Sérstaklega gaman að sjá götumyndir frá Reykjavík frá svona 1984, ógeðslega fyndin föt og hárgreiðsla :) Svo er náttúrulega frábær tónlistin í myndini, get alveg mælt með þessari mynd.

Gisti í sveitinni í nótt og ég fékk nú bara heimþrá. Núna vil ég bara vera í íbúðinni minni :) Sá annars geðveikt fyndna frétt í kvöldfréttum ruv í gær. Sá ekki alveg byrjunina en það var allavegana einhver sem hafði bjargað ungum erni og var að hlúa að honum. Þetta eru svo fyndin dýr, ég sat ein heima og dó úr hlátri. Mér finnast dýr almennt mjög fyndin og dýrka svona fréttaskot :) :)

Úff hvað er mikill mánudagur í mér, er alveg dedd. Held að þetta leiðindarok fari svona með mann, ég fauk allavegana uppeftir í vinnuna í morgun og þurfti varla að stíga á bensíngjöfina :) Helgin var viðburðarík hjá mér, ég flutti í nýju íbúðina á laugardaginn og það tókst svona líka vel. Við komum öllu draslinu mínu úr Borgarnesi í einni ferð og svo skotgekk að raða inn í íbúðina. Ég er alveg í skýjunum yfir þessu og líður rosalega vel á heimilinu mínu. Er búin að sofa tvær nætur og hef bara sofið eins og steinn. Þetta er samt svoldið skrýtið verð ég að viðurkenna að vera allt í einu búin að eignast mína eigin íbúð, er varla búin að fatta þetta ennþá. Kíkti í partý til Hrafns á laugardagskvöldið í tilefni þess að Magga og Sigfús eru alkomin heim frá Danmörku og það var svaka stuð. Annars eru allir velkomnir í heimsókn á Strandveg 18, nú er maður tilbúinn að fara að monta sig af gripnum :)