Ahhh frídagur á morgun, lúxus maður :)

Fín helgi liðin og góð tilbreyting að fá þetta fína veður.
Fórum fjölskyldan í sund á laugardaginn eftir vinnu hjá mér og það var mjög gaman. Kristján Ari var í essinu sínu og vildi ekkert fara upp úr. Ætlaði að hlaupa út úr sturtunni og fara í "bað attur" :) Um kvöldið fór ég í gæsun hjá Ingu Lilý og það var mjög gaman.
Í gær komst ég svo loksins aftur á fimleikaæfingu. Ég var svoldið stressuð, var alveg viss um að ég myndi vera hrikalega léleg. En viti menn (verð bara að monta mig), ég tók bara framförum og gerði ein araba streit út í gryfju. Ekkert smá stolt sko :) Það voru alveg ótrúlega fáir á æfingunni svo að það var stanslaus keyrsla allan tíman enda er ég nett þreytt í líkamanum í dag.
Í bílnum á leiðinni hlustaði ég á Ladda safndiskinn, Hver er sinnar kæfu smiður. Guð hvað hann er fyndinn, ég dýrka þessi Ladda lög. Sérstaklega þegar lagið "hvítlaukurinn" kom þá gat ég varla keyrt. "Sparaðu hvítlaukinn Hallgrímur miiinn...... Snilld.

Þá er maður kominn aftur til vinnu eftir langt helgarfrí :)

Við fórum fjölskyldan til London á sumardaginn fyrsta og komum heim á mánudaginn. Ferðin var æðisleg og ekki skemmdi veðrið fyrir. Allt orðið grænt og útsprungið þarna, yndislegt. Við gistum hjá Sólveigu frænku en hún býr í hverfi sem heitir Kew og er í suðvestur London. Mjög sjarmerandi og skemmtilegt hverfi sem liggur við Thames ána. Kristján Ari er mikill heimsmaður og skemmti sér konunglega í margmenninu í London. Hann sat bara eins og engill í kerrunni og horfði á allt fólkið og bílana. Hann lagðist svo bara út af og sofnaði þegar hann varð þreyttur. Við gerðum ýmislegt skemmtilegt, fórum í Harrods, löbbuðum um Hyde Park og fórum í Natural History Museum þar sem við sáum m.a. beinagrind af risaeðlu og steypireyð í fullri stærð (hann er á stærð við skip). Versluðum aðeins í H&M en tókum engan trylling samt. Á laugardaginn var Kristján í pössun hjá Sólveigu og við skelltum okkur á fótboltaleik. Fórum að sjá West Ham og Everton á heimavelli West Ham. Þetta var ótrúleg upplifun, sérstaklega þar sem West Ham vann 1-0. Ótrúleg læti og fullt af bullum. Eftir það fórum við í miðbæ London og löbbuðum um og enduðum svo á mjög flottum veitingastað í Covent Garden. Þessi ferð á veitingastaðinn var aldeilis eftirminnileg því að þar dró Jenni upp hringana og bað mín :) :) Rosalega rómantískt. Hann kom mér gjörsamlega á óvart og ég er bara enn í skýjunum. Jenni var búinn að vera að plana þetta í mánuð án þess að ég fattaði neitt og meira að segja tók hring frá mér til að smíða eftir.
Þessi London ferð mun seint gleymast.

Ég er hérna í vinnunni eins og ég veit ekki hvað, hundslöpp og mygluð :( Hefði betur átt að vera heima í gær, maður græðir aldrei á því að harka hlutina af sér og mæta í vinnuna :( :(
Ég verð að vera hress á morgun því ég þarf að vera í Stykkishólmi þar sem að við erum að flytja útibúið í glænýtt húsnæði og mikið húllumhæ í kringum það. Svo London á fimmtudaginn (jess). Þoli ekki veikindi, missti t.d. af fimleikaæfingu út af þeim urrrrr. Ekki gott.

Nóg af sjálfsvorkun og kvarti, þurfti bara smá útrás ;)

Í gær voru 17 ár síðan ég fermdist í Seljakirkju. Þetta sýnir manni hvað maður er orðinn gamall. Ég og Anna Sig fermdumst einmitt saman. Ég man að ég var með smá púður í andlitinu og ekkert annað. Ekki einu sinni maskara. Þetta er aðeins öðruvísi núna þar sem fermingarpíurnar fara í brúnkusprey, neglur og plokkun og ég veit ekki hvað. Frekar fyndið. Ég hugsa nú samt að aðalgellurnar í Seljaskóla 1990 hafi verið vel málaðar, kannski ekki mikið að marka mig ;) Það eru nú ekki mjög mörg ár síðan ég byrjaði að nota púður og maskara daglega. Er ekki þessi meikup týpa.

Er heima í dag með lítinn lasarus. Kvef, hiti, astmi og niðurgangur, hann hefur ekki átt 7 dagana sæla greyið. Það er ósköp notalegt að vera heima svona einn dag og hugsa um ungann. Hann er nú að hressast en það er spurning hvort við setjum hann til dagmömmunar á morgun. Ekki gott að honum slái niður þar sem að það styttist óðum í London.

Páskarnir voru stórfínir og alveg yndislegt að fá frí. Það var nú nóg að gera hjá okkur, ein ferming og tvö fjölskyldumatarboð en það var bara mjög næs. Kíktum á páskadag til Önnu, Ása og Elvars litla. Elvar er algjör gullmoli, hann var glaðvakandi og greinilega mikill selskapsmaður :) Kristjáni Ara fannst barnið ekkert spennandi, miklu skemmtilegra að skoða öll tækin og takkana á heimilinu. Já hann er svolítill skæruliði drengurinn, það er bara tékkað á öllu því sem er spennandi hvað sem það er.

Ég ætla að skella mér í bæjarferð í kvöld og fara á fimleikaæfingu. Það er allt of langt síðan síðast og ég get ekki beðið eftir að fara og hrista aðeins á mér rassgatið ;) Nóg komið af nammiáti og leti!!!! Annað kvöld eru svo tónleikar með Peter, Björn og John á Nasa og það verður örugglega mikið fjör. Algjört snilldarband þarna á ferðinni.

3 DAGAR Í PÁSKAFRÍ !!!

Ahhh bara 3ja daga vinnuvika :)
Það mætti halda að mér leiddist alveg óskaplega í vinnunni, alltaf að telja niður í einhver frí. Mér finnst mjög fínt í vinnunni og dagarnir fljúga yfirleitt áfram en það er nú samt alltaf gott að fá frí. Páskafríið er alltaf gott frí og kærkomið tækifæri til að slaka á. Ég þarf reyndar að vinna á laugardaginn sem að slítur aðeins fríið en það eru bara 4 tímar sem verða ekki lengi að líða. Býst við að það verði alveg brjálað að gera.

Helgin var alveg stórskemmtileg. Á föstudagskvöldið fórum við Jenni á tónleika í Fossatúni og hlustuðum á Pétur Ben og hin færeyska Teit. Þeir voru báðir mjög skemmtilegir og notaleg stemmning á Fossatúni. Ætli það hafi ekki verið um 50 manns þarna. Valur passaði frænda sinn á meðan og var það ekki erfið pössun þar sem Kristján var farinn að sofa og Valur gat bara hangið og horft á sjónvarpið.
Á laugardaginn komu Villi, Gunna og Grímur í heimsókn og voru í mat. Það var náttúrulega mikið fjör á bænum og litlu frændurnir mjög ákveðnir og sambandið þeirra á milli stundum stormasamt. Það er bara krúttlegt, þetta eru ennþá svo miklir óvitar :)
Í gær fórum við í bæinn og kíktum á dýrin í Húsdýragarðinum. Minn maður var nú ekkert ofsalega hrifin af stóru dýrunum, kýrnar eru ansi stórar þegar maður stendur svona nálægt þeim :) Hann var nú hugrakkari þegar við skoðuðum hænurnar og hanana. Eftir dýrin fór ég á fimleikaæfingu sem var náttúrulega frábær eins og alltaf og mjög erfið, enduðum hana á þrekhring dauðans og ég hélt ég gæti ekki labbað út. Enduðum svo kvöldið á bíóferð, fórum að sjá Hot Fuzz sem er ensk spennu- grínmynd. Mjög fyndin og skemmtleg, mæli með henni.